Museum_large

කොළඹ ජාතික කෞතුකාගාරය විවෘතව තැබෙන දින සම්බන්ධයෙන් දැනුම්දීමක්

2025 සැප්තැම්බර් 01 දින සිට ‍සඳුදා දිනයන්හි කොළඹ ජාතික ‍කෞතුකාගාරය සහ ජාතික ස්වභාවික විද්‍යා කෞතුකාගාරය මහජන ප්‍රදර්ශනයට විවෘත නොකෙරෙන බව ඡාතික කෞතුකාගාර දෙපාර්තමේන්තුව නිවේදනයක් නිකුත් කරමින් සඳහන් කරනවා.

ජාතික කෞතුකාගාර දෙපාර්තමේන්තුවට අයත් සියලුම කෞතුකාගාර සතියේ සෑම සඳුදා දිනකම නඩත්තු කටයුතු සඳහා වසා තිබෙන බවයි එම නිවේදනයේ සඳහන් වන්නේ.

සතියේ අනෙකුත් සෑම දිනකම හා සති අන්තයේ පෙ.ව. 9.00 සිට ප.ව 6.00 දක්වා කෞතුකාගාරය විවෘතව පවතිනවා.

රජයේ ප්‍රසිද්ධ නිවාඩු දින අතුරින් ජාතික නිදහස් දිනය සිංහල හින්දු අලුත් අවුරුදු නිවාඩු දින 02ක් කම්කරු දිනය හා වෙසක් පෝය දිනය යන දිනයන්හිද කෞතුකාගාරය විවෘත නොකරන බව එම නිවේදනයේ වැඩිදුරටත් සඳහන්.

අනෙකුත් ප්‍රාදේශීය කෞතුකාගාර විවෘතව තබන වේලාව පෙ.ව 9.00 සිට ප.ව 5.00 දක්වා වන අතර ප්‍රවේශපත්‍ර නිකුත් කිරීම ප.ව. 4.00 ට අවසන් වනවා.

AP25226392635556-1755179595

කාශ්මීරයේ හදිසි ගංවතුරෙන් මියගිය පිරිස 300 ඉක්මවයි

කාශ්මීරයේ ඇති වූ අධික ගංවතුර සහ නායයෑම් හේතුවෙන් මියගිය සංඛ්‍යාව අඛණ්ඩව ඉහළ යමින් පවතින බව විදෙස් මාධ්‍ය වාර්තා කරනවා.

ගංවතුර තත්ත්වය හේතුවෙන් මේ වනවිට මියගොස් ඇති පිරිස 307කට වැඩි බවයි විදෙස් මාධ්‍ය  වාර්තා කරන්නේ.

මේ වන විට වැඩිම මරණ සංඛ්‍යාවක් වයඹදිග පාකිස්තානයේ කඳුකර කයිබර් පක්තුන්ක්වා පළාතෙන් වාර්තා වන බව විදෙස් මාධ්‍ය වැඩිදුරටත් සඳහන් කරනවා.

එමෙන්ම ආපදාවට පත් පිරිස් ගලවා ගැනීමේ මෙහෙයුමක් අතරතුරදී ඒ සඳහා යොදාගත් හෙලිකොප්ටරයක් කඩා වැටීමෙන් එහි සිටි කාර්ය මණ්ඩල සාමාජිකයින් 05 දෙනෙකුද ජීවිතක්ෂයට පත්ව ති‍බෙනවා.

මේ අතර එරට රජයේ කාලගුණික වාර්තාවන් පෙන්වා දී ඇත්තේ එළැඹෙන අගොස්තු 21 වැනිදා දක්වා රටේ වයඹ දෙසින් තද වැසි අපෙක්ෂා කළ හැකි බවයි.

පවතින කාලගුණ තත්ත්වය සැලකිල්ලට ගනිමින් ප්‍රදේශ කිහිපයක් ආපදා කලාප ලෙස ප්‍රකාශයට පත් කිරීමටද එරට රජය පියවර ගෙන තිබෙනවා.

23391769-1b9f-4e40-ade5-d5fbddb72861_large

ඇමෙරිකා එක්සත් ජනපද නාවික හමුදාවට අයත් ‘USS Santa Barbara නෞකාව කොළඹ වරායට

ඇමෙරිකා එක්සත් ජනපද නාවික හමුදාවට අයත් ‘USS Santa Barbara (LCS32)’  නෞකාව සැපයුම් හා සේවා අවශ්‍යතා සපුරා ගැනීම සඳහා ඊයේ (16) උදෑසන කොළඹ වරායට පැමිණි අතර, ශ්‍රී ලංකා නාවික හමුදාව විසින් එම නෞකාව, නාවික හමුදා සම්ප්‍රදායානුකුලව පිළිගැනීම සිදුකරනු ලැබුවා.

මෙලෙස කොළඹ වරායට පැමිණි Littoral Combat වර්ගයට අයත් ‘USS Santa Barbara (LCS32)’ නෞකාව, එක්සත් ජනපද හත්වන (7th Fleet) නෞකා බල ඇනියට අයත් නෞකාවක් වන අතර, එය දිගින් මීටර් 127.6 ක් වනවා.

මෙම නෞකාවේ අණදෙන නිලධාරී ලෙස කටයුතු කරනු ලබන්නේ කමාන්ඩර් A. J. OCHS යි.

ලබන 22 වැනිදා දක්වා USS Santa Barbara නෞකාව කොළඹ වරායේ නැංගුරම්ලා ඇති අතර මෙම නෞකාව කොළඹ වරායට පැමිණි පළමු අවස්ථාව මෙය බවයි අමෙරිකානු තානාපති කාර්යාලය සඳහන් කළේ.

weather forcast

දවසේ කාලගුණ අනාවැකිය – 2025 අගෝස්තු 17 ඉරිදා

අද (17) දිනයේදී දිවයිනේ බස්නාහිර සහ සබරගමුව පළාත්වලත් මහනුවර, නුවරඑළිය, ගාල්ල සහ මාතර දිස්ත්‍රික්කවලත් වයඹ පළාතේත් විටින් විට වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසනවා.

දිවයිනේ සෙසු ප්‍රදේශවල ප්‍රධාන වශයෙන් වැසි රහිත කාලගුණ තත්ත්වයක් පවතින බවයි එම දෙපාර්තමේන්තුව සඳහන් කළේ.

මධ්‍යම කඳුකරයේ බටහිර බැවුම් ප්‍රදේශවලත් උතුරු, උතුරු-මැද, වයඹ සහ දකුණු පළාත්වලත් ත්‍රිකුණාමලය දිස්ත්‍රික්කයේත් විටින් විට හමන පැ.කි.මී. (40-50) ක පමණ තද සුළංද ඇතිවිය හැකි බව කාලගුණ නිවේදනයේ සඳහන්.